SAMÞYKKTIR BÚGREINADEILDAR HROSSABÆNDA BÆNDASAMTAKA ÍSLANDS

I. kafli. Almennt, tilgangur og félagsaðild.

1. gr.
Almennt

1.1       Hrossabændur innan Bændasamtaka Íslands (hér eftir BÍ) mynda með sér deild sem heitir Búgreinadeild hrossabænda (hér eftir deildin).

2. gr.
Tilgangur

2.1.      Tilgangur deildarinnar er að sameina þá sem stunda hrossarækt um hagsmunamál sín og vinna að framgangi greinarinnar innan BÍ.

2.2       Tilgangur deildar hrossabænda BÍ er að:

1. Vera málsvari félagsmanna og koma fram fyrir þeirra hönd.
2. Vinna ötullega að ræktun og stofnvernd íslenska hestsins og viðhalda erfðabreidd hans.
3. Sjá um skipun í fagráð hrossaræktar og vera leiðandi í allri þróun greinarinnar, mótun ræktunarstefnu og skýrsluhaldi.
4. Hafa forystu um þróun og stjórnun World Fengs
5. Glæða áhuga fyrir hrossarækt og hestamennsku með öflugu fræðslu- og kynningarstarfi.
6. Vinna að sölumálum og kynningarstarfi fyrir reiðhesta, kynbótahross og hrossaafurðir.
7. Stuðla að góðu uppeldi, aðbúnaði og meðferð hrossa.
8. Hafa samvinnu við önnur félög um mál sem stuðlað geta að betri aðbúnaði og velferð hrossa.
9. Standa fyrir fræðslu um meðferð beitilands og mikilvægi góðrar umgengni um náttúru landsins.

Vinna ber að því að sameina alla hrossabændur innan vébanda Bændasamtaka Íslands til að efla slagkraft greinarinnar.

3. gr.
Félagsaðild

3.1.      Rétt til aðildar að deildinni hafa einstaklingar og lögaðilar sem stunda hrossarækt, enda séu þeir fullgildir félagsmenn að BÍ.

3.2.      Einungis félagsmenn og fulltrúar lögaðila í deildinni sem hafa fulla aðild, sbr. 1. mgr., og starfsmenn BÍ geta gegnt trúnaðarstörfum fyrir deildina.

II. kafli. Deildarfundur

4. gr.
Deildarfundur

4.1.      Um deildarfund gilda samþykktir BÍ. Stjórn deildarinnar, í samráði við stjórn BÍ og framkvæmdastjóra, boðar til deildarfundar með þeim fyrirvara sem tilgreindur er í samþykktum BÍ. Deildarfundur er löglegur sé löglega til hans boðað.

4.2.      Deildarfund sitja með fullum réttindum allir félagsmenn sem skráðir eru í deild hrossabænda og hafa skráð sig á fundinn fyrir þann tíma sem tilgreindur er í samþykktum BÍ.

4.3       Deildarfundur er opinn til áheyrnar öllum félagsmönnum. Óski fleiri aðilar en skráðir fulltrúar deildarfundar eftir því að sitja deildarfund með málfrelsi og tillögurétt skal það borið undir fundinn.

4.4.      Á dagskrá deildarfundar skal m.a. vera:

1. Kosning embættismanna fundarins skv. tillögu stjórnar.
2. Skýrsla stjórnar.
3. Samþykktir deildarinnar.
4. Tillögur til umræðu og afgreiðslu.
5. Kosning stjórnar, skv. 5. gr.
6. Önnur mál.
   

4.5.      Deildarfundur kýs sér fundarstjóra sem stjórnar fundinum og tekur ákvörðun um málsmeðferð og atkvæðagreiðslur. Fundarstjóri tilnefnir fundarritara.

4.6.      Einfaldur meirihluti greiddra atkvæða ræður úrslitum við afgreiðslu mála, nema þar sem samþykktir deildarinnar eða BÍ mæla fyrir um aukinn meirihluta. Séu atkvæði jöfn í kosningu trúnaðarmanna skal hún endurtekin. Séu atkvæði enn jöfn skal hlutkesti ráða.

4.7.      Mál sem taka á til afgreiðslu á deildarfundi, skulu hafa borist stjórn deildarinnar innan þess tímafrests sem samþykktir BÍ kveða á um. Á deildarfundi er skylt að fjalla um öll þau mál sem berast frá fullgildum félagsmönnum, sbr. 3. gr.

4.8.      Öll gögn sem leggja á fram, til umfjöllunar eða afgreiðslu skulu birt fulltrúum deildarfundar innan þess tímafrests sem samþykktir BÍ kveða á um. Deildarfundur getur þó ákveðið að taka til afgreiðslu eða umfjöllunar mál eða málsgögn sem koma fram síðar.

4.9.      Nefndarstörf vegna tillagna eru ákveðin hverju sinni af stjórn. Stjórn ákveður heiti starfsnefnda og fjölda þeirra. Stjórn raðar fulltrúum í nefndir og skipar formenn þeirra. Stjórn úthlutar nefndum málum til umfjöllunar.

4.10.    Heimilt er að boða til auka deildarfundar, sbr. samþykktir BÍ.

III. kafli. Stjórn, hlutverk og störf deildarinnar

5. gr.
Stjórn deildarinnar

5.1.      Stjórn deildarinnar skipa 5 einstaklingar, kosnir til þriggja ára í senn og þrír til vara. Skulu þeir kosnir þannig að formaður er kosinn sérstaklega þriðja hvert ár og tveir meðstjórnendur hvort hinna áranna. Stjórnin skiptir að öðru leyti með sér verkum. Árlega skal kjósa þrjá varamenn og ræður atkvæðafjöldi hver tekur sæti fyrst við fjarveru aðalmanns.

5.2.      Ný stjórn deildarinnar tekur við að loknu Búnaðarþingi.

5.3.      Hlutverk stjórnar er að fara með málefni hrossabænda innan BÍ, tryggja að með árvekni og festu sé unnið að hagsmunamálum greinarinnar og að ályktunum deildarfundar sé framfylgt í samræmi við stefnu BÍ og í samstarfi við stjórn BÍ hverju sinni.

5.4.      Formaður boðar til stjórnarfunda, þegar ástæða þykir til og stjórnar þeim. Þó er honum skylt að boða fund ef tveir stjórnarmenn óska þess, enda sé þá fundarefnið tilgreint. Stjórnarfundur er lögmætur sé meirihluti stjórnarmanna á fundi.

5.5.      Stjórn deildarinnar skal rita fundargerðir á fundum sínum. Fundargerðir skulu birtar á Mínum síðum BÍ svo fljótt sem unnt er og að meginreglu eigi síðar en að loknum næsta stjórnarfundi. Stjórnarmenn skulu staðfesta fundargerðina með undirritun sinni, hvort sem er skriflega eða rafrænt, og hún varðveitt með tryggilegum hætti.

5.6.      Undirskriftir þriggja stjórnarmanna þarf til að skuldbinda deildina eða að stjórn feli fulltrúa til að undirrita fyrir hönd deildarinnar.

5.7. Stjórn deildarinnar er jafnframt stjórn Félags hrossabænda.

VI. kafli. Kjör Búnaðarþingsfulltrúa

6. gr.
Kjör Búnaðarþingsfulltrúa

6.1.      Um fjölda Búnaðarþingsfulltrúa deildarinnar gilda samþykktir BÍ. Í kjöri geta verið allir þeir fulltrúar sem skráðir eru á deildarfund ásamt stjórn deildarinnar. Stjórn deildarinnar ákveður hvernig farið er með kjörið, hvort sem það er með tilnefningu og ákvörðun stjórnar eða kosningu.

6.2.      Listi yfir kjörna Búnaðarþingsfulltrúa skal liggja fyrir samkvæmt þeim frestum sem kveðið er á um í ákvæðum samþykkta BÍ.  

6.3.      Kjör Búnaðarþingsfulltrúa gildir milli Búnaðarþinga.

V. Almennt um samþykktir

7. gr.
Breytingar á samþykktum

Samþykktum þessum má aðeins breyta á deildarfundi eða aukadeildarfundi, sem boðaður er til þess sérstaklega. Ná þær því aðeins fram að ganga að meirihluti fulltrúa fundarins greiði þeim atkvæði.

8. gr.
Forgangsáhrif

Þar sem ákvæðum samþykkta þessum sleppir gilda samþykktir BÍ.

9. gr.
Gildistaka

Samþykktir þessar taka þá þegar gildi.

Þannig samþykkt á auka deildarfundi búgreinadeildar hrossabænda Bændasamtaka Íslands, 5. febrúar 2026.