BREYTING Á STAÐGENGILSTRYGGINGU

Félagsmenn í Bændasamtökunum hafa haft aðgang að staðgengilstryggingu (hóptryggingu) hjá Sjóvá síðan 1. apríl 2023. Velferðarsjóður BÍ, sem félagsmenn greiða í, hefur staðið straum af greiðslu iðgjalda og eigin áhættu vegna tjóna.

Ákveðið hefur verið að gera breytingar á fyrirkomulagi Velferðarsjóðs, m.a. með því að bjóða ekki lengur upp á staðgengilstryggingu hjá Sjóvá. Síðasti gildisdagur tryggingarinnar var 31. mars 2026. Félagsmenn í BÍ geta engu að síður tilkynnt tjón til Sjóvár eftir 1. apríl 2026 ef tjónsatvik (óvinnufærni og kostnaður vegna staðgengils) falla innan gildistíma tryggingarinnar. Félagsmenn eru hvattir til að tilkynna tjón við fyrsta tækifæri. 

Stjórn Bændasamtakanna vinnur nú að nýju fyrirkomulagi Velferðarsjóðs sem verður kynnt innan tíðar. Stefnan verður áfram sú sama – að fjármunir Velferðarsjóðs nýtist félagsmönnum til góðs þegar óhöpp eða áföll dynja á.

Hér að neðan er að finna helstu upplýsingar um staðgengilstrygginguna. Starfsfólk BÍ getur veitt nánari upplýsingar en að öðru leyti skal leita til Sjóvár varðandi bætur og meðhöndlun tjóna.

Spurt og svarað um Staðgengilstryggingu

Hvað er Staðgengilstrygging?

Staðgengilstrygging greiðir kostnað við staðgengil eða aðkeypta þjónustu sem fellur til ef félagsmaður verður óvinnufær í a.m.k. þrjá mánuði af völdum veikinda eða slysa.

Hverjir eru tryggðir í Staðgengilstryggingu?

Staðgengilstrygging nær yfir alla félagsmenn Bændasamtaka Íslands á aldrinum 18  til og með 74 ára.

Hvað eru bætur staðgengilstryggingar háar og hvað eru þær greiddar lengi?

Bætur geta orðið allt að 350.000 kr. á mánuði  og eru greiddar í sex mánuði að hámarki, þó ekki fyrir fyrsta mánuð óvinnufærni.

Hvað þarf óvinnufærni að vera mikil til að eiga rétt á bótum úr Staðgengilstryggingu?

Óvinnufærni þarf að vera 50% að lágmarki til að eiga rétt á bótum úr Staðgengilstryggingu.

Hvenær falla nýir félagsmenn Bændasamtakanna undir Staðgengilstryggingu?

Nýir félagsmenn eru tryggðir í Staðgengilstryggingu eftir þrjá mánuði frá félagsaðild.

Hvernig tilkynni ég tjón í Staðgengilstryggingu?

Þú getur tilkynnt í gegn um heimasíðu Sjóvár, www.sjova.is.  Á forsíðunni er grænn hnappur „Tilkynna tjón“. Þegar þú hefur smellt á hann, skráir þig inn með rafrænum skilríkum og hefur ferlið. Spurningarnar skýra sig sjálfar en mikilvægt er að hafa eftirfarandi í huga:

• Þar sem spurt er hver sé skráður fyrir tryggingunni, er kennitala Bændasamtaka Íslands slegin inn en hún er 631294-2279
• Þar sem óskað er eftir fylgigögnum, setur þú inn afrit af reikningi fyrir þjónustu staðgengils eða aðra aðkeypta þjónustu sem er eingöngu til kominn vegna óvinnufærninnar.

Þegar þú hefur lokið ferlinu fer það í vinnslu hjá Sjóvá sem sendir þér upplýsingar um næstu skref.