Árið 2005 hófst gagnasöfnun vegna M.Sc. verkefnis Elinar Grethardsdóttur, nema við Landbúnaðarháskóla Íslands,
um flæðihraða mjólkur við mjaltir. Helstu niðurstöður verkefnisins liggja nú fyrir og byggja þær á 3.519 mælingum úr 2.368 kúm.
Vegna umfangs og uppsetningar gagna var ákveðið að nota aðeins gögn frá mjaltabásabæjum en gögnum var einnig safnað frá mjaltaþjónabúum.

 

Meðalflæðihraði mjólkur við mjaltir á íslenskum kúm er samkvæmt rannsókninni 1,74 kg/mín og hámarksflæðihraðinn er 2,73 kg/mín. Fljótustu kýrnar gefa allt að 7 kg/mín en þær tregustu nokkuð innan við 1 kg/mín. 

Erlendar heimildir, sem flestar byggja á rannsóknum á Holstein-Friesian kúm, benda til þess að meðalflæðihraði hjá þeim sé 2,5-2,7 kg/mín og hámarksflæðihraði sé 3,6-4,2 kg/mín. Mesti flæðihraði í erlendum heimildum er 18 kg/mín. Er það á rennsli í þokkalegri garðslöngu.

 

Útreikningar erfðastuðla sýna að arfgengi þessara eiginleika er hátt og erfðabreytileiki því mikill. Það segir að auðvelt er að taka þennan eiginleika með í ræktunarstarfi og úrval fyrir honum ætti að gefa ágætan árangur, þrátt fyrir fremur smáa afkvæmahópa hér á landi. 

 

Arfgengi er tala á bilinu 0-1 sem segir af hversu miklu leyti eiginleiki stjórnast af erfðum. Ýmsir frjósemiseiginleikar, t.d. hlutfall til endursæðinga eftir tiltekinn tíma, hafa mjög lágt arfgengi, 0,01-0,03 en hvernig gripir eru á litinn og hvort þeir eru hyrndir eða ekki, stjórnast algerlega af erfðum og hafa því arfgengi upp á 1.

 

Vinna við verkefnið stendur ennþá yfir og vonir standa til að henni ljúki fljótlega á nýju ári. Elin vill koma á framfæri kærum þökkum til þeirra bænda sem lögðu til gögn í verkefnið.