Gunnar Þorgeirsson, garðyrkjubóndi Ártanga og Trausti Hjálmarsson, sauðfjárbóndi Austurhlíð, sækjast eftir að verða formaður Bændasamtaka Íslands. Gunnar Þorgeirsson hefur gengt embættinu frá 2020 og sækist eftir endurkjöri. Trausti Hjálmarsson hefur verið formaður deildar sauðfjárbænda frá 2022 en lét af því embætti á Deildafundum búgreina 12. og 13. febrúar síðastliðinn. Framboðsfrestur til formanns rann út á miðnætti 22.febrúar og verða því tveir í kjöri.

Rafræn kosning mun standa í 48 klukkustundir frá miðnætti 1.mars til miðnættis 2.mars. Slóð á kosningasíðuna verður gerð aðgengileg á heimasíðu Bændasamtakanna, bondi.is, og send félagsmönnum í tölvupósti þegar kosning hefst. 2449 einstaklingar eru á kjörskrá, en til að öðlast kosningarétt þurfti að greiða félagsgjöld fyrir 31. desember 2023. Félagsmenn þurfa að skrá sig með rafrænum skilríkjum til að geta kosið. Allir aðilar sem skráðir voru á félagsaðild 31.12.2023 geta kosið, þannig geta fleiri en einn haft kosningarétt frá sama búi. Hægt er að kjósa oftar en einu sinni, en einungis síðasta atkvæðið gildir.

Niðurstöður kosninga munu liggja fyrir á hádegi 3.mars. Kjörstjórn mun í kjölfarið senda frá sér fréttatilkynningu um niðurstöður kosninganna.