Nú er kominn leiðari ágúst mánaðar inn á naut.is og var penninn að þessu sinni í höndum Elínar Heiðu Valsdóttur, meðstjórnanda í stjórn LK. Í leiðaranum kemur hún inn á mörg mikilvæg mál eins og stöðu búvörusamninganna, mikilvægi íslensks landbúnaðar fyrir jafnt Íslendinga og erlenda ferðamenn og hvað þarf til svo íslenskur landbúnaður dafni enn betur en hingað til.

 

Þá veltir hún einnig fyrir sér stefnumörkun íslenskrar nautgriparæktar og segir m.a.: „Við sem störfum við mjólkur- og nautakjötsframleiðslu gerum kröfu um eðlilega rekstrarafkomu og sambærileg vinnu- og búsetuskilyrði og aðrar stéttir. Við viljum einnig að slagkraftur atvinnugreinarinnar njóti sín, viðhalda fjölda framleiðenda, nýliðun sé auðveld,  framþróun verði í bútækni og að félagsstarfið sé öflugt.  Þessi sjónarmið er oft vandasamt að samræma, en það eru áskoranir sem kúabændur eru óhræddir við að takast á við á hverjum tíma. Það hefur sýnt sig undanfarin ár að kúabændur eru fljótir að bregðast við breytilegum markaðsaðstæðum og grípa þau tækifæri sem bjóðast. Mikil hagræðing hefur orðið í mjólkurframleiðslunni og slagkraftur búanna aukist. Spennandi tímar eru framundan í nautakjötsframleiðslunni með innflutningi erfðaefnis og uppbyggingu ræktunarkjarna holdagripa. Umræðu um stefnumörkun heima á hverju búi, hjá atvinnugreininni og um stöðu okkar í samfélaginu taka kúabændur hvenær sem er.“ Leiðarann má lesa í heild sinni hér á forsíðu naut.is/SS