Í nýrri vísitölu neysluverðs fyrir marsmánuð kemur fram hækkun um 1,47% sem þýðir að sl. 12 mánuði mælist verðbólga 8,7% í landinu. Vísitala neysluverðs án húsnæðis hefur hækkað um 6,4% á sama tíma. Verðbólga hér á landi hefur ekki verið jafn mikil frá því í mars 2002 þegar hún mældist einnig 8,7%. Í janúarmánuði 2002 mældist verðbólgan 9,4% og 8,9% í febrúar 2002.

Kjöt lækkaði um 1,39%
Verð á mat- og drykkjarvörum hækkaði um 0,35 og áhrif á vísitölu eru 0,04 prósentustig. Mest hækkaði verð á brauði og kornvörum eða um 2,47%. Fiskur hækkaði um 1,79% og sykur, súkkulaði og sælgæti hækkaði um 1,62%. Kjöt lækkaði um 1,39% sem hafði áhrif til lækkunar um 0,04 prósentustig. Mjólk ostar og egg lækkuðu um 0,08% og grænmeti og kartöflur um 1,32%. Meðfylgjandi tafla sýnir breytingar helstu matvöruliða frá fyrra mánuði.

	mars
	Breyting frá síðasta mánuði, %	Áhrif á vísitölu, %
Vísitala neysluverðs	1,47	1,47
Matur og drykkjarvörur	0,35	0,04
Matur	0,4	0,05
Brauð og kornvörur	2,47	0,05
Kjöt	-1,39	-0,04
Fiskur	1,79	0,01
Mjólk, ostar og egg	-0,08	0
Olíur og feitmeti	0,9	0
Ávextir	0,01	0
Grænmeti, kartöflur o.fl.	-1,32	-0,01
Sykur, súkkulaði, sælgæti o.fl.	1,62	0,02
Aðrar matvörur	2	0,02
Drykkjarvörur	-0,13	0

Hækkanir raktar til innfluttra vara
Hækkanir á vísitölu neysluverðs má einkum rekja til hækkana á innfluttum vörum, s.s. bílum, bensíni, fötum og skóm. Kostnaður vegna reksturs eigin bifreiðar jókst um 3,1% (vísitöluáhrif 0,45%). Þar af hækkaði verð á nýjum bílum um 2,9% (0,18%) og á bensíni og olíum um 5,0% (0,25%). Vetrarútsölum er víðast lokið og hækkaði verð á fötum og skóm um 6,3% (0,26%). Kostnaður vegna eigin húsnæðis jókst um 1,1% (0,22%), þar af voru 0,15% áhrif vegna hærri raunvaxta og 0,07% vegna hækkunar á markaðsverði húsnæðis.
/EB