Heimsmarkaðsverð á smjöri er nú um stundir hreint ótrúlega hátt eins og við höfum áður greint frá og í síðustu viku hækkaði smjörverðið enn frekar er haldið var uppboð á mjólkurvörum á afurðamarkaðinum í Hollandi. Verð á smjörtonninu endaði þá í 5.600 evrum eða um 630.000 krónum og hefur verð á smjöri nú hækkað um 41% á þessu ári á hollenska afurðamarkaðinum.

En það er ekki bara smjörverðið sem er gríðarlega hátt nú um stundir, aðrar mjólkurvörur sem ganga kaupum og sölum á milli landa eins og mjólkurduft, undanrennuduft og mysuduft hefur einnig hækkað þó það sé nokkuð mismikið eftir flokkum. Fituríku vörurnar hafa hækkað mest en þær fituminni hafa átt heldur minna upp á pallborðið hjá alþjóðlegum kaupendum.

Þessi þróun verðs á vörum í heimsviðskiptum eru afar góð tíðindi fyrir þá sem standa í útflutningi en einnig þær afurðastöðvar sem hafa notað þessa markaði til þess að losa sig við umframframleiðslu, enda hafa slíkar afurðastöðvar oft þurft að sætta sig við afar lágt verð fyrir slíkan útflutning/SS,