Valio í Finnlandi hefur nú fyrst fyrirtækja í heiminum hafið sölu á drykkjarmjólk í umbúðum sem brotna að fullu niður í náttúrunni! Fernur þessar eru, eins og svo ótal margar aðrar, framleiddar af Tetra Pak í Svíþjóð og eru þær framleiddar að öllu leiti úr hráefni sem unnið er úr plöntum. Hingað til hafa allar fernur verið með örþunna plastfilmu og jafnvel plasttappa sem þá hefur verið unnið úr olíu en nú er þetta plastefni unnið úr plöntuleifum.

 

Þetta hefur verið markmið Tetra Pak í áraraðir og nú hefur loks tekist að finna aðferð sem er umhverfisvæn og er þetta gríðarlega stór áfangi fyrir mjólkurpökkun í heiminum. Forsvarsmenn Valio ákváðu að nota vörulínuna Eila í tilarunaskyni með þessar nýju umbúðir en Eila er vörulína mjólkurvara sem eru án mjólkursykurs/SS.