Það er gangur í hlutunum hjá hinu finnska afurðafyrirtæki Valio, en félagið er líkt og MS úrvinnslu og sölufélag 5 stórra og tveggja smárra afurðastöðva í eigu þarlendra kúabænda. Stjórn Valio hefur ákveðið að byggja nýja afurðastöð í nágrenni við aðra sem félagið á í bænum Herajoki en hin nýja afurðastöð á að verða tilbúin árið 2016. Áætlað að framkvæmdirnar kosti félagið um 27 milljarða króna en í hinni nýju afurðastöð verða framleiddar mjólkursykurlausar vörur, jógúrt og margskonar sérvörur með hátt innihald af próteini.

 

Líkt og margir vita hefur MS einmitt flutt út til Finnlands töluvert magn af próteindrykkjum og er ljóst að Valio ætlar sér inn á þann markað einnig. Það er þó fyrst og fremst hinar mjólkursykurlausu vörur með Valio horfir til með uppbyggingunni enda hefur félagið náð afar góðri fótfestu með vörumerki sínu Eila® og er m.a. með meira en 55% markaðshlutdeild mjólkurvara í þessum flokki í Svíþjóð. Þá horfa Finnarnir einnig til nágranna sinna í Rússlandi, en þar er ógnarstór markaður sem er í mikilli þróun/SS.