Samkvæmt fréttatilkynningu sem tölfræðiskrifstofa bandaríska landbúnaðarráðuneytisins (NASS) er útlit fyrir metuppskeru á maís þar í ár. Búist er við því að uppskeran verði 332,7 milljónir tonna sem er fjórðungi meira en í fyrra og 10% meira en árið 2004, sem var metár. Búist er við að uppskera af hektaranum verði tæp 9,6 tonn sem er það næstmesta í sögunni, árið 2004 var hún rétt rúmlega 10 tonn á hektara. Það sem hefur þó úrslitaáhrif á magnið er að bandarískir bændur hafa ekki sáð maís í jafn mikið flatarmál síðan 1933. Fróðlegt verður að fylgjast með því hvaða áhrif þetta hefur á maísverð, en hann er uppistaðan í flestum kjarnfóðurblöndum.

Af öðrum jarðargróðri er það að frétta að uppskera á sojabaunum mun minnka um 18%, sem skýrist að mestu leyti af því að 15% minna var sáð af henni í vor en í fyrra. Bændur hafa greinilega meira uppúr því að sá maís en soja. Búist er við því að uppskera af hektaranum verði rúm 2,8 tonn.

Horfur í hveitinu eru mjög góðar, uppskera á því verður 57,4 milljónir tonna, sem er 17% meira en á síðasta ári. Uppskera af hektaranum verður að líkindum 2,7 tonn.

 

 

Ath. Þeim sem lesa upprunalega textann skal bent á að í Kananslandi er uppskera mæld í skeppum pr. ekru. Skeppa (bushel) af maís vegur 25,4 kg en hún er 27,2 kg í soja og hveiti. Ekra er 0,4046 ha.