Í lok ársins 2007 voru 2.709 mjaltaþjónar í notkun á 1.728 kúabúum á Norðurlöndunum. Fjölgun mjaltaþjónabúa milli ára var 29,7% og er þessi tækni nú í notkun á 4,3% kúabúa í þessum heimshluta. Í töflunni hér að neðan má sjá skiptingu milli landa en eins og gefur að skilja eru flestir mjaltaþjónar í Danmörku, sem er lang umfangsmesta mjólkurframleiðslulandið í. Framleiðslan þar er um 4,5 milljarðar lítra, Svíþjóð er í öðru sæti með 3 milljarða lítra, Finnland í þriðja með 2,3 milljarða, Noregur í fjórða sæti með einn og hálfan milljarð lítra og Ísland rekur lestina með 125 milljón lítra framleiðslu árið 2007. 

 

Land	Fjöldi búa	Fjöldi mjaltaklefa
Danmörk	608	1.298
Svíþjóð	433	641
Finnland	311	369
Noregur	297	307
Ísland	79	94
Alls	1.728	2.709

 

Ef fjöldi mjaltaþjónabúa er tekið sem hlutfall af öllum kúabúum, þá er það hæst í Danmörku 12,9% en næst hæst hér á landi, 10,7%. Ef miðað er við að um hvern mjaltaþjón séu 50 kýr, þá voru tæp 19% íslenskra kúa mjólkaðar með þessari tækni í lok síðasta árs, á meðan hún var notuð við mjaltir á 12% danskra kúa. Ríflega 20% af mjólkinni koma frá mjaltaþjónabúum hér á landi en 12,8% mjólkurmagnsins í Danmörku.

 

Þess má geta að fyrsti mjaltaþjónn var settur upp hér á landi haustið 1999 og er enn í notkun.

 

Samantekt Snorra Sigurðssonar, meðlims í tæknihópi NMSM er að finna hér.