Vikuna 24. til 27. janúar s.l. komu um 2.000 grunnskólanemendur á aldrinum 8 til 10 ára og kennarar þeirra í heimsókn til Mjólkursamsölunnar til að kynnast mjólkurframleiðslu. Þetta er árviss viðburður sem staðið hefur í tugi ára og orðinn að u.þ.b. 40 ára hefð hjá MS. Skólarnir sjá um ferðir barnanna á heimsóknarstaðinn að Bitruhálsi 1 og svo fara hóparnir í u.þ.b. klukkustundar skoðunarferð með leiðsögumanni og þiggja léttar veitingar í lokin. Að sögn Baldurs Jónssonar hjá Sölu- og markaðssviði MS sýna börnin mikinn áhuga á því sem fyrir augu ber og hafa greinilega mjög gaman af því að koma í heimsókn til MS. Starfsmenn víðsvegar innan fyrirtækisins sjá svo um að leiðbeina

hópunum og koma margir að því verkefni, m.a. mjólkurfræðingar, sölufólk, skrifstofufólk, framkvæmdastjórar og forstjóri.

 

Hressir krakkar í heimsókn hjá MS

 

 

 

 

 

 

 

 

 

 

 

 

 

 

 

 

 

 

 

 

 

 

 

„Allt framleiðsluferlið var skoðað en skoðunarferðin hófst þar sem tekið er á móti mjólkinni frá bændum. Þaðan var farið inn á minjasafn Mjólkursamsölunnar þar sem krakkarnir gátu séð bæði áhöld og tæki sem notuð voru til heimavinnslu og mjólkurframleiðslu í upphafi síðustu aldar. Hápunktur skoðunarferðarinnar var svo þegar krakkarnir voru frædd um það hvernig afar þeirra og ömmur fóru á sínum tíma út í mjólkurbúð til að kaupa mjólk í brúsum og flöskum fyrir miðja síðust öld!

 

Á minjasafninu ráku börnin upp stór augu þegar við þeim blasti bullustrokkur, handknúin skilvinda, mjólkursigti, mjaltatæki og margt fleira. Einnig vakti það eftirtekt að í gamla daga voru mjólkurbúðir í höfuðborginni. Þangað kom fólk með sína eigin brúsa til að kaupa mjólk en hún fékkst einnig í glerflöskum. Þarna eru einnig mjólkurhyrnurnar sem tóku við af brúsum og glerflöskum árið 1958. Skyrið var viktað jafnóðum og pakkað í pappír en þá var það óhrært og þykkara en í dag. Mjólkurbíll árgerð 1935 er á safninu og fjölmargar ljósmyndir frá fyrri tímum“, sagði Baldur.

  

Mjólkurframleiðslan útskýrð

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Frá minjasafninu fóru hóparnir svo aftur inn í nútímann og fóru að mjólkurmóttökunni og ferli mjólkurinnar var svo fylgt allt þar til hún var komin í ýmsar afurðir s.s. nýmjólk, fjörmjólk, rjóma og súrmjólk. Svo fengu börnin að sjá mjólkina í sínum réttu umbúðum í risastórum kælilager MS, tilbúna til flutnings til skóla eða verslana. Að lokum var svo ferðinni heitið í Emmess ísgerðina, en á leiðinni þangað varð á vegi barnanna hann Lalli töframaður sem vakti mikla kátínu og gleði.

 

Hér fyrir neðan má sjá fleiri myndir sem teknar voru þegar krakkarnir komu í heimsókn til MS.

Mjólkurvöruúrval fyrri tíma s.s. gamlar mjólkurumbúðir, flöskur, brúsar ofl.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Fylgst með mjólkurpökkun

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Mjólkurbíll árgerð 1935!