Beint í efni

Um hálf milljón kúabúa innan EES svæðisins

20.09.2012

Samkvæmt upplýsingum frá DG Agri, landbúnaðarstofnun Evrópusambandsins, var fjöldi kúabúa (með meira en 50% tekna sinna af mjólkurframleiðslu) innan hinna 27 landa sambandsins 539 þúsund árið 2008 og hafði búum þá fækkað um 5% frá fyrra ári. Ef þessi tala er framreiknuð með áþekkri fækkun búa gæti fjöldinn í ár verið um 450-470 þúsund bú. Við þessa tölu má svo bæta fjölda skráðra kúabúa í bæði Noregi og Íslandi (rétt um 12 þúsund bú um síðustu áramót) og finna þannig fjölda sérhæfðra kúabúa innan landa EES-svæðisins. Alls má þannig gera ráð fyrir því að fjöldi kúabúa innan landa EES séu um 460-480 þúsund nú um stundir.

 

Með sama hætti má reikna út fjölda kúa á EES-svæðinu en að viðbættum fjölda kúa á Íslandi og í Noregi eru þær væntanlega um 16,5-17,5 milljónir. Af þessu leiðir að meðalbústærðin er trúlega í kringum 33-35 kýr pr. bú en meðalfjöldi kúa á hverju kúabúi innan landa Evrópusambandsins árið 2008 var 33 kýr.

 

Lang flestar kýr eru í Þýskalandi og Frakklandi eða um 7,5 milljónir en fæstar eru á Möltu eða rétt um 6 þúsund. Næsta land fyrir ofan Möltu er svo Ísland með um 25 þúsund mjólkurkýr og í þriðja sæti (neðan frá) er svo Lúxemborg með um 38 þúsund kýr. Eina landið í viðbót, sem er með færri en 100 þúsund mjólkurkýr, er svo Grikkland en þar er einungis að finna um 75 þúsund mjólkurkýr/SS – DG Agri.