Norska afurðafélagið Tine, sem er samvinnufélag þorra norskra kúabænda, var rekið með nærri 25 milljarða króna hagnaði á síðasta ári. Heildarvelta félagsins var alls 269 milljarðar króna og er því hagnaðurinn hlutfallslega afar mikill. Þetta eru afar góð tíðindi fyrir eigendur félagsins en Tine hefur gengið í gegnum all nokkrar þrengingar á liðnum árum eins og við höfum sagt frá hér á naut.is.

Samkvæmt tilkynningu frá Tine þýðir þessi sterka rekstrarniðurstaða að félagið stendur afar sterkt gagnvart samkeppni erlendis frá en fyrirséð að norskar mjólkurvörur muni lenda í töluverðri samkeppni á komandi árum.

Þegar rýnt er í reksturinn má sjá að það er sala Tine á ostum sem hefur skilað sér vel inn í reksturinn á síðasta ári en drykkjarmjólkursala hefur hins vegar hopað nokkuð. Útflutningur hefur einnig skipt Tine máli en 13% af veltunni kom frá útflutningi mjólkurvara.

Að teknu tilliti til hagnaðar félagsins og arðgreiðslu á hvern innveginn líter mjólkur þá endaði meðal afurðastöðvaverð Tine árið 2016 í 5,69 norskum krónum eða sem svarar til 71,4 íslenskum krónum/SS.