Í dag er gerð krafa til þess í lífrænt vottaðri framleiðslu að kálfurinn sé með kúnni í amk. 1 sólarhring en margir neytendur hafa viljað sjá þennan tíma töluvert lengri. Það hefur þó ekki verið auðvelt að útbúa slíkt kerfi, þ.e. leyfa kálfinum að ganga undir og mjólka kúna samhliða en kýrnar selja oft illa í mjaltaaðstöðunni ef kálfur gengur undir.

Nú hefur fundist ákveðin leið í þessa átt en á búinu Ellinglund, sem er lífrænt vottað kúabú, í Danmörku fer nú í sumar fram tilraun þar sem verið er að prófa nýtt kerfi þar sem kálfurinn er með kúnni fyrstu 14 dagana! Kerfið byggir á því að kýrnar eru með kálfunum í sérstakri stíu þar sem kálfarnir komast í var og geta verið lokaðir inni á meðan mjöltum stendur. Eftir tvær vikur eru kálfarnir settir í hóp með öðrum kálfum og fóstrum, þ.e. sérstökum kúm sem sinna kálfunum og eru tveir til fjórir kálfar undir hverri eftir nyt. Mæður kálfanna eru á sama tíma færðar yfir í aðal framleiðsluhópinn/SS.