Samtök afurðastöðva í mjólkuriðnaði hafa sent frá sér svofellda fréttatilkynningu:

 

Frá 2003 þegar aðgerðir hófust fyrir alvöru til að lækka vinnslukostnað í mjólkuriðnaði hefur kaupmáttur launa til kaupa á mjólkurvörum vaxið um um það bil 20%. Þetta kemur fram í greiningu Samtaka afurðastöðvar í mjólkuriðnaði á gögnum úr rekstri fyrirtækja í greininni.

Þessu hefur fyrst og fremst verið náð fram með hagræðingu í mjólkuriðnaðinum. Vinnslustöðvum hefur fækkað og starfsfólki fækkað um þriðjung. Á fyrri hluta tímabilsins var nánast verðstöðvun á mjólkurvörum þrátt fyrir 25% verðbólgu í landinu. Frá 2008 hefur verð á mjólkurvörum hækkað innan marka neyslu- og launavísitölunnar.

Þessum árangri hefur verið náð með ríflega 3 milljarða króna kostnaðarhagræðingu á ársgrunni á þessum 12 árum. Tveir milljarðar króna gengu til beinnar raunlækkunar vöruverðs í gegnum ákvarðanir verðlagsnefndar búvöru. Einn milljarður fór til þess að greiða bændum hærra mjólkurverð sem ekki birtist í vöruverði á markaði. Þannig var neytendum hlíft við gríðarlegum verðhækkunum á aðföngum bænda í gegnum hagræðingu í mjólkuriðnaði. Samtök afurðastöðva í mjólkuriðnaði telja að á næstu misserum verði hægt að ná fram töluverðri viðbótarhagræðingu í greininni.

Á meðfylgjandi súluriti má sjá þróun kaupgjalds, verðlags og mjólkurvöruverðs á þessu hagræðingartímabili.