Danone, næst stærsta mjólkurafurðastöð í heimi, hefur nú ákveðið að sækja frekar inn á austur-evrópskan markað með því að sameina hluta af starfseminni við UniMilk í Rússlandi. Í fréttatilkynningu frá fyrirtækjunum kemur fram að eftir samrunann verður hið nýja fyrirtæki leiðandi á sk. CIS svæði (samband landa fyrrum Sovétríkjanna). Starfsemi fyrirtækisins verður í

 

 

 

 

Úkraínu, Kasakstan, Hvíta-Rússlandi og Rússlandi, þar sem markaðshlutdeild þess verður um 21%.

 

Heildarvelta fyrirtækisins er áætluð um 1,5 milljarðar Evra (um 240 milljarðar Íkr) og munu um 18.000 manns starfa hjá því. Ætlað er að samruninn verði að veruleika í haust, eftir að þar til bær yfirvöld hafa fjallað um hann.

 

Skýring:

Um Unimilk

Fyrirtækið er í einkaeigu og er næst stærsti framleiðandi mjólkurafurða og barnamats í Rússlandi. Fyrirtækið var stofnað árið 2002 og er með 28 framleiðslustaði í Rússlandi, Úkraínu og Hvíta-Rússlandi með 14.000 starfsmenn. Unimilk á leiðandi vörumerki í mjólkurvörum í CIS löndunum og árið 2009 var velta þess um 1 milljarður Evra eða um 157 milljarðar Íkr sem var aukning um 7% frá árinu 2008.

 

Um Danone

Fyrirtækið er eitt af Fortune 500, þ.e. eitt af 500 stærstu fyrirtækjum í heimi. Danone er næst stærsta mjólkurafurðastöðin í heiminum með 160 framleiðslustaði, 80.000 starfsmenn og er með starfsemi í öllum heimsálfum og 120 löndum. Tekjur fyrirtækisins árið 2009 voru 15 milljarðar Evra eða 2.360 milljarðar Íkr sem svarar til rúmlega fjórfaldra tekna íslenska ríkisins. Fyrirtækið er stærst í heiminum í sölu ferskra mjólkurvara, næst stærsti vatnssöluaðili í heimi og næst stærsta fyrirtæið sem selur barnamat.