Beint í efni

Stjórn SMK: leggja skal aðildarumsókn til hliðar

01.09.2011

Í gær samþykkti stjórn SMK, sem eru samtök mjólkur- og kjötvinnslufyrirtækja og starfa innan Samtaka Iðnaðarins, ályktun um að leggja beri aðildarumsókn að Evrópusambandinu til hliðar við þá miklu óvissu um sem nú ríkir, bæði um myntsamstarfið, uppbyggingu og innra skipulag ESB.

 

Ályktunin er svohljóðandi:
„Samtökin telja að hagsmunum Íslands sé betur borgið utan Evrópusambandsins horft til framtíðar. Við núverandi aðstæður innan Evrópusambandsins, þar sem grundvallarmál, sem snerta framtíð myntbandalagsins og uppbyggingu og skipulag Evrópusambandsins sjálfs eru til umræðu meðal aðildarþjóða og niðurstöðu ekki að vænta í fyrirsjáanlegri framtíð er rétt af Alþingi að leggja aðildarumsóknina til hliðar.

 
Það er ljóst að samningaviðræður snúast um afsal á yfirstjórn fiskveiða og fiskimiða og samningsrétti við aðrar þjóðir um skiptingu mikilvægra deilistofna svo og um grundvallarbreytingar í rekstri landbúnaðar á Íslandi, sem reynslan sýnir að geta beinlínis stofnað veigamiklum þáttum hans í voða.

 
Aðildarviðræðunum fylgir mikill kostnaður og aðildinni enn meiri kostnaður ef að yrði.  Ísland þarf nú fyrst og fremst á að halda  samstöðu og samtakamætti til að byggja upp og þróa grundvallaratvinnuvegi þjóðarinnar.

 
Aðildarumsóknin sundrar þjóðinni og gerir henni ókleift að ná saman um aðkallandi verkefni“. 

 

SS – fréttatilkynning