Fyrirtækið Frontmatec er sérhæft í framleiðslu tækja og tóla fyrir matvælaiðnað og er m.a. framarlega í framleiðslu margskonar þjarka. Nú hefur fyrirtækið gefið út að stefnan hafi verið sett á að framleiða þjarka fyrir sláturhús en þjarkar nýtast einmitt sérstaklega vel þar sem unnin eru vel skilgreind og eins störf líkt og gert er á sláturlínum í sláturhúsum.

Fyrirtækið hefur nú þegar hannað búnað fyrir svínasláturhús og nú er röðin komin að nautgripasláturhúsunum segir í tilkynningu frá fyrirtækinu. Það verður þó bið á því að hægt verði að kaupa þjarka sem leysa af fólk í nautgripasláturhúsunum enda er ekki gert ráð fyrir að fyrsti þjarkinn frá Frontmatec verði tilbúinn fyrr en eftir tvö ár. Þó má ljóst vera að sé hægt að yfirfæra þá tækni sem notuð er í fullkomnustu svínasláturhúsum heims í dag, þá verður hægt að stórauka afköst við nautgripaslátrun í framtíðinni með mun færri vinnustundum starfsfólks/SS