Við höfum greint frá því hér á naut.is fyrr á árinu að bæði yfirvöld í Ítalíu og Portúgal hafa nú gert kröfu um að ýmsar landbúnaðarvörur séu sérstaklega merktar upprunalöndunum og það með skýrum hætti. Fleiri lönd hafa nú gert svipaða kröfu, en tilgangurinn er fyrst og fremst að tryggja að neytendur landanna hafi skýrar og greinargóðar upplýsingar um það sem þeir eru að kaupa og geti  þar með valið landbúnaðarvörur með tilliti til uppruna þeirra. Á því leikur væntanlega ekki neinn vafi að afurðastöðvar landanna vilja gjarnan að þetta sé gert, þ.e. séu þær ekki í miklum útflutningi, en oftar en ekki hefur slíkum óskum ekki verið vel tekið af helstu verslunarkeðjum og því hafa ríkisstjórnir landanna gripið til þessa ráðs. Nú hefur svo Spánn bæst í hópinn og ætla þarlend stjórnvöld að gera tilraun með svona merkingar á mjólk og mjólkurvörum næstu tvö árin.

Fram kemur í tillögum landbúnaðarráðuneytis Spánar að ef mjólk sé notuð sem hráefni í matvæli, og að hlutfall hennar sé að lágmarki 50% af innihaldi vörunnar, þá skuli upprunans getið sérstaklega og með skýru letri í amk. sömu stærð og það letur sem notað er fyrir innihaldslýsingu/SS.