Á sama tíma og hér á landi hefur gengið afar vel með sölu mjólkurvara er hreint ekki sömu sögu að segja um stöðuna í Bretlandi. Sé t.d. litið til heildarmagns seldrar mjólkur í Bretlandi þá varð alls 0,3% samdráttur í sölunni árið 2016 í samanburði við árið 2015. Þó náðist heldur meira út úr markaðinum en heildarveltan jókst um 0,8% á þessum sama tíma en mjólkurvörur í Bretlandi hækkuðu að jafnaði um 1,1% á síðasta ári.

Sé horft til einstakra flokka þá er áhugavert að skoða hvernig skipting á drykkjarmjólk er á breska markaðinum en 86,8% af drykkjarmjólkursölunni er hefðbundin gerilsneydd mjólk. Örsíuð mjólk, en það er mjólk sem fer í gegnum örfínar síur sem fjarlægja bakteríur úr hrámjólkinni, stóð undir 5,2% af sölunni og G-mjólk, eða sem kölluð er UHT mjólk erlendis, stóð undir 4,3% af sölunni og aðrar mjólkurgerðir stóðu svo undir síðustu 3,7%/SS.