Það er óhætt að segja að snjallsímar séu mikið tækniundur enda í raun litlar lófatölvur sem geta hreint ótrúlegustu hluti. Margir bændur eru þegar komnir með snjallsíma og nánast á hverjum degi bætast við ný smáforrit (App) sem létta bændum heimsins vinnu sína. En hver er útbreiðslan hér á landi? Við spyrjum m.a. að því í smákönnun hér á síðunni enda forvitnilegt að sjá hvort stórt hlutfall notenda naut.is notist við snjallsíma og/eða Facebook.

 

Könnun sem gerð var meðal danskra bænda fyrir skömmu leiddi í ljós að 53% þeirra eru komnir með snjallsíma en fyrir ári síðan var hlutfallið 27%, þ.e. tvöföldun á einu ári. Hins vegar er um fjórðungur danskra bænda með Facebook, sem þó er afar hátt hlutfall í raun. Þessi hraða útbreiðsla hefur gert það að verkum að bæði ráðgjafaþjónustan og fréttaveitur eru að þróa framboð sitt í nýja átt sem hentar breyttum tímum.

 

Þessi þróun er gríðarlega hröð og viðbúið að þjónustuaðilar bænda séu vart búnir að átta sig á því hve miklir möguleikar fylgi snjallsímum. Þetta snýr auðvitað bæði að nauðsyn þess að setja heimasíður upp þannig að lestur þeirra henti snjallsímum en einnig snýr þetta að framleiðslu á smáforritum.

 

En hvers konar sérhæfðu smáforrit í landbúnaði má þá nálgast í dag? Það væri nú trúlega til þess að æra óstöðugan að reyna að halda úti lista um góð smáforrit fyrir snjallsíma, en leita má að þessu á netinu og koma þá upp þúsundir valmöguleika oftast þó erlend smáforrit! Þannig má t.d. nálgast veðurforrit, spáforrit um uppskeru, forrit sem halda utan um lög og reglulgerðir (fyrir bandaríska bændur).

 

Í dag eru einnig komin smáforrit sem létta bændum dagleg störf og t.d. má í því sambandi nefna að fyrirtækið DeLaval hefur gefið út myndskreytt veggspjald með sk. QR kóðum af helstu stöðum á mjaltaþjóni þeirra sem þarf að hafa eftirlit með. Veggspjaldið er plastað og því ætlað að hanga nálægt mjaltaþjóninum. Með því að skanna inn kóðann á viðkomandi stað á veggspjaldinu, fer umsvifalaust í gang kennslumyndband í símanum sem sýnir hvernig staðið er að viðkomandi viðgerð eða eftirliti. Lely er einnig með smáforrit sem auðveldar bændum að fletta í bæklingum ofl. svo óhætt er að fullyrða að flestir aðilar á markaðinum eru nú þegar að bjóða upp á þjónustu á þessu sviði/SS.