Margir bændur eru nú með marga smákálfa í eldi og af því tilefni erum við með smákálfaviku hér á naut.is! Dagana 9. til og með 14. nóvember munum við birta 6 pistla hér á naut.is sem lúta allir að umhirðu og eldi á smákálfum, en tilgangurinn er að fara yfir sviðið og draga saman þekkingu um eldi og umhirðu á smákálfum.

 

Tilraun sem gerð var í Bandaríkjunum og greint var frá í sumar á ársfundi ADSA (American Dairy Science Association), hafði það að markmiði að skoða áhrif útihitastigs á smákálfa. Í ljós kom að þegar kalt er í veðri skiptir miklu máli að bæta kálfinum upp orkutapið með viðbótar mjólkurgjöf. Þess má reyndar geta að í tilrauninni var mældur lofthiti í kringum kálfana frá mínus -2,4°C og upp í +8,5°C.

 

Tilraunin var gerð á 16 Holstein smákálfum sem skipt var í tvo hópa. Annar hópurinn var á sk. orkulágu eldi og fékk 666 grömm mjólkurþurrefnis á dag en hinn hópurinn var á orkuhærra eldi og fékk 1.000 grömm mjólkurþurrefnis á dag. Fylgst var með líkamshita kálfanna og var hitastig kálfanna á orkuháa eldinu með 0,1°C hærra hitastig að jafnaði en hinir kálfarnir.

 

Það sem kom þó í ljós var að á nóttunni, þegar smákálfarnir lágu í „hreiðrum sínum“ hækkaði alltaf líkamshitinn um 0,5°C óháð gefnu mjólkurmagni. Niðurstaðan bendir til þess að þó svo að mjólkurmagnið skipti máli þegar líkamshitinn er annars vegar þá skiptir líklega meira máli að kálfarnir geti legið í þurrum og miklum hálmi þegar kaldast er.

 

Benda má á frekara lesefni um mikilvægi þess að kálfum standi til boða þurrt undirlag með því að smella á eldri frétt af naut.is hér/SS.