Haraldur Benediktsson, formaður Bændasamtakanna, kom fram í fréttaviðtali í kvöldfréttum Sjónvarps í gærkvöldi þar sem hann fordæmdi alla meðferð á gripum sem sjást á myndum Matvælastofnunar af býlinu Brúarreykjum. Hann sagði málið slæmt fyrir ímynd bændastéttarinnar en mál sem þessi vektu jafnan mikla athygli. Þetta væru sem betur fer algjör undantekningartilfelli, væri slæmt og ætti alls ekki að líðast.

Eins og fjallað hefur verið um í fréttum afturkallaði Matvælastofnun starfsleyfi búsins í lok nóvember.

Steingrímur J. Sigfússon, atvinnuvega- og nýsköpunarráðherra, sagði í hádegisfréttum útvarps að mál eins og það á Brúarreykjum gæti skaðað sterka ímynd íslensks matvælaiðnaðar. Hann sagðist treysta Matvælastofnun sem færi þarna að lögum og væri að sinna sínum skyldum. „Það verður að taka svona mál mjög alvarlega, bæði út frá hollustuþáttunum og dýravelferðarþáttunum,“ sagði ráðherra.

Fréttaupptökur RÚV:
Fordæmir aðbúnaðinn á Brúarreykjum
 
Steingrímur J. segir ástandið hörmulegt