Atvinnuvega- og nýsköpunarráðuneytið hefur hætt við ráðningu í stöðu skrifstofustjóra á skrifstofu matvæla og landbúnaðar, sem auglýst var 1. júní sl. Þess í stað hefur verið ákveðið að sameina skrifstofu matvæla og landbúnaðar og skrifstofu alþjóðamála undir skrifstofustjóra þeirrar síðarnefndu.“

Þetta kom fram í bréfi sem umsækjendur um starfið fengu sent í gær, 27. september. Þar segir að eftir að ráðningarferlið hófst hafi skipulagsbreytingar verið til umfjöllunar í ráðuneytinu og sameina eigi skrifstofu matvæla og landbúnaðar, sem er ein þriggja fagskrifstofa sem heyra undir sjávarútvegs- og landbúnaðarráðherra, undir skrifstofu alþjóðamála. Markmið breytinganna sé að „efla stjórnun og samhæfingu, jafna álag og bæta nýtingu starfsfólks. Jafnframt hefur verið ákveðið að ráðast í vinnu við frekari skipulagsbreytingar á næstunni.“ eins og segir í bréfinu.

Sindri Sigurgeirsson, formaður Bændasamtakanna, lýsir yfir verulegum vonbrigðum í samtali við bbl.is og hefur hann miklar áhyggjur af stöðu mála í ráðuneytinu. „Nú nýlega hættu tveir reynslumiklir starfsmenn ráðuneytisins á sviði landbúnaðar og það er alveg ljóst að stjórnsýsla landbúnaðarmála stendur veikari á eftir. Við finnum það sem erum í reglulegum samskiptum við ráðuneytið að þar eru alltof fáir starfsmenn. Það er slæmt fyrir hagsmuni landbúnaðarins.“ Segir Sindri sameiningu skrifstofu matvæla og landbúnaðar við skrifstofu alþjóðamála hljóma undarlega og að ráðherra verði að tala skýrar um framtíðarhlutverk og fyrirkomulag í ráðuneytinu. „Það sýnir kannski forgangsröðun ríkisstjórnarinnar að hún vill koma landbúnaðinum fyrir í skúffu á alþjóðasviði sjálfs atvinnuvegaráðuneytisins.“

Kristján Þór Júlí­us­son, land­búnaðar­ráðherra, seg­ir í samtali við mbl.is að ákvörðun um að hætta við ráðningu í embætti skrif­stofu­stjóra mat­væla og land­búnaðar í at­vinnu­vegaráðuneyt­inu sé liður í því að styrkja stjórn­sýslu land­búnaðar­mála inn­an þess eins og kallað hafi verið eftir. Seg­ir hann að með þessu opn­ist mögu­leiki á að ráða fleira sér­fræðinga til þess að sinna land­búnaðar­mál­um í ráðuneyt­inu. „Það sem ég er að gera núna er að ég er að styrkja skrif­stof­una með þeim hætti að leggja af eitt skrif­stofu­starf og færa skrif­stofu­stjóra inn­an ráðuneyt­is­ins til í starfi. Ég geri ráð fyr­ir að við mun­um þá ráða einn til tvo starfs­menn í staðinn, sér­fræðinga, inn á land­búnaðarskrif­stof­una í staðinn til viðbót­ar við það góða fólk sem þar er fyr­ir ásamt því að færa til verk­efni og mann­skap inni í ráðuneyt­inu til enn frek­ari styrk­ing­ar.“

Sig­urður Páll Jóns­son, þingmaður Miðflokks­ins, hef­ur óskað eft­ir fundi í at­vinnu­vega­nefnd vegna máls­ins.