Lokun rússneska markaðarins hefur ekki einungis komið illa við íslenska sauðfjárbændur og afurðastöðvar þeirra heldur hefur þessi lokun almennt leitt til mikilla vandræða útflutningsgreina í landbúnaði víða í Evrópu. Franska afurðafyrirtækið Danone lenti m.a. í þessu er markaðurinn lokaðist og stöðvaðist þar með leið fyrirtækisins með jógúrt inn á markaðinn í Rússlandi. Lengi vel var þó markaðinum í Rússlandi sinnt með því að gera samkomulag við rússneskar afurðastöðvar, sem hafa framleitt jógúrt í umboði Danone en stöðugt hækkandi afurðastöðvaverð hefur þrengt að þessari framleiðslu og ábatinn til Danone verið of lítill.

Til þess að leysa málið hafa nú forsvarsmenn fyrirtækisins sett í gang stórtæk áform en alls stendur til að flytja fimm þúsund mjólkurkýr til Síberíu, nánar tiltekið til bæjarins Tyumen þar sem hefja á framleiðslu á mjólk og jógurtvinnslu. Í Tyumen er gott aðgengi að gróffóðri og framleiðslukostnaður mjólkurinnar metinn það hagstæður að það borgar sig að standa í þessari umfangsmiklu aðgerð en kýrnar koma frá bæði Hollandi og Þýskalandi og þurfa því að leggja að baki um 4.500 km leið áður en þær komast á áfangastað.