Sjávarútvegs- og landbúnaðarráðherra hefur breytt skipan samráðshóps um endurskoðun búvörusamninga. Í tilkynningu frá atvinnuvegaráðuneytinu kemur fram að breytingar séu gerðar „með það fyrir augum að stuðla að meiri sátt og víðtækara samkomulagi um frekari uppbyggingu íslensks landbúnaðar. Sérstaklega er horft til þess að auka vægi umhverfis- og neytendasjónarmiða í samræmi við stefnuyfirlýsingu ríkisstjórnarinnar.“ Svanfríður Jónasdóttir, fyrrverandi sveitarstjóri Dalvíkurbyggðar og fyrrverandi alþingismaður, verður formaður hópsins.

Fulltrúum í hópnum er fjölgað úr tólf í þrettán og skipan þriggja fulltrúa af fimm sem fyrri ráðherra skipaði án tilnefningar verið afturkölluð; Guðrún Rósa Þórsteinsdóttir, Ögmundur Jónasson og Björg Bjarnadóttir eiga ekki lengur sæti í nefndinni og  í stað þeirra hefur ráðherra skipað Brynhildi Pétursdóttur, fyrrverandi alþingismann og starfsmann Neytendasamtakanna og Svanfríði Jónasdóttur. Umhverfisráðherra tilnefnir einn fulltrúa og Félag atvinnurekenda einn, til viðbótar þeim sem þegar voru skipaðir samkvæmt tilnefningu.

Nýjan samráðshóp um endurskoðun búvörusamninga skipa:

• Svanfríður Jónasdóttir, formaður (skipuð af ráðherra)
• Brynhildur Pétursdóttir (skipuð af ráðherra)
• Elín Margrét Stefánsdóttir (skipuð af ráðherra)
• Jóna Björg Hlöðversdóttir (skipuð af ráðherra)
• Þórunn Pétursdóttir (Umhverfisráðherra)
• Páll Rúnar Mikael Kristjánsson (Félag atvinnurekenda)
• Róbert Faresveit (Alþýðusamband Íslands)
• Ólafur Arnarsson (Neytendasamtökin)
• Andrés Magnússon (Samtök atvinnulífsins)
• Sindri Sigurgeirsson (Bændasamtök Íslands)
• Björgvin Jón Bjarnason (Bændasamtök Íslands)
• Elín Heiða Valsdóttir (Bændasamtök Íslands)
• Helga Jónsdóttir (Bandalag starfsmanna ríkis og bæja)