Síðastliðinn miðvikudag voru kunngjörðar fyrstu niðurstöður sameiginlegs ræktunarstarfs í nautgriparækt í Danmörku, Svíþjóð og Finnlandi. Kúabændur í þessum löndum hafa komið sér saman um sameiginleg ræktunarmarkmið í þremur helstu mjólkurkúastofnunum; svartskjöldóttu kúnum (Holstein Friesian), rauðu kúnum (RDM, SRB og FAY) og Jersey. Þetta mun gera þeim kleyft að bera kynbótaeinkunnir saman þvert á landamæri, naut sem t.d. er notað bæði í Danmörku og Svíþjóð fær sömu kynbótaeinkunnina í báðum löndunum. Hið sameiginlega kynbótamat hefur hlotið nafnið NTM, Nordic Total Merit, eða Norræn heildareinkunn.

Í töflunni hér að neðan má sjá vægi einstakra eiginleika hjá svartskjöldóttu kúnum og þeim rauðskjöldóttu. Til samanburðar eru áherslurnar sem í gildi eru hér á landi.

 

Eiginleiki	Svartskjöldóttar kýr	Rauðar og rauðskjöldóttar kýr	Íslenskar landnámskýr
Afurðir (kg prótein)	30,5%	37,4%	44%
Júgurhreysti, mótstaða gegn júgurbólgu	14,2%	13,0%	8%
Frjósemi	12,6%	10,6%	8%
Júgur	7,3%	13,0%	16%*
Burðarerfiðleikar	6,9%	4,9%	0%
Lífsþróttur kálfa	6,1%	5,7%	0%
Fætur	6,1%	3,7%	0%
Mótstaða gegn öðrum sjúkdómum**	4,9%	4,9%	0%
Ending	4,5%	3,3%	8%
Mjaltir	3,3%	2,4%	8%
Kjötframleiðsla (vaxtarhraði)	2,4%	0,0%	0%
Skap	1,2%	1,2%	8%

*Spenar eru hér meðtaldir, með 8% vægi. ** Doði, súrdoði o.s.frv.

 

Heimild: http://www.nordicebv.info