Samkvæmt yfirliti Samtaka afurðastöðva í mjólkuriðnaði (SAM) var sala á fitugrunni 147,8 milljónir lítra síðustu 12 mánuði (febrúar 2022 – janúar 2023) og 129 milljónir lítra á próteingrunni. Salan hefur aukist undanfarið árið á bæði prótein- og fitugrunni en á tólf mánaða tímabili jókst salan um 3,9% á próteingrunni og 1,5% á fitugrunni. Síðustu þrjá mánuði ársins hefur aukningin verið meiri eða 6,1% á próteingrunni og 2,9% á fitugrunni. Sé horft einungis til janúarmánaðar, þá var próteinsalan í janúar í ár 10% meiri en í janúar í fyrra á salan á fitugrunni 5,8% meiri janúar í ár en í janúar 2022.

Á sama tíma, þ.e. síðustu 12 mánuði, hefur mjólkurframleiðslan dregist saman um 0,5% þrátt fyrir aukningu um 2,4% síðustu þrjá mánuði. Þannig nam innvigtun mjólkur síðustu tólf mánuðina 148,2 milljónum lítra. Árið byrjar þó með örlítið meiri framleiðslu miðað við sama mánuð í fyrra. Heildar innvigtunin í janúar var 12,2 milljón lítrar, sem er rúmlega 225 þúsund lítrum meira en í janúar árið 2022 og svarar þessi munur til 1,9%.