Samkvæmt yfirliti Samtaka afurðastöðva í mjólkuriðnaði (SAM) var sala á fitugrunni 145,7 milljón lítrar síðustu 12 mánuði (september 2021 – ágúst 2022) og 125,5 milljón lítrar á próteingrunni. Það þýðir að salan á bæði prótein- og fitugrunni hefur aukist miðað við sambærilegt tímabil fyrir ári síðan. Alls jókst salan á fitugrunni um 0,8% síðustu 12 mánuði, og á sama tíma jókst salan á próteingrunni um 2,2%. Sé horft til síðustu þriggja mánaða sjáum við söluaukningu um 4,7% á próteingrunni og  2,1% á fitugrunni. Miðað við júlí í fyrra jókst salan um 1,0% á próteingrunni en dróst saman um 0,6% á fitugrunni.

Á sama tíma, þ.e. síðustu 12 mánuði, hefur mjólkurframleiðslan dregist saman í samanburði við sambærilegt tímabil mánuðina 12 þar á undan. Þannig nam innvigtun mjólkur 146,3 milljón lítra sem er 1,6% samdráttur frá sama tímabili fyrir ári síðan.

Heildarinnvigtunin í júlímánuði nam 12,4 milljónum lítra, sem er rúmlega 715 þúsund lítrum minna en í júlí árið 2021 og því samdráttur um 5,5%. Heildarinnvigtun fyrstu sjö mánuði ársins er 88,4 milljónir lítra samanborið við 91,0 milljón lítra árið 2021 og nemur mismunurinn 2,8%.