Beint í efni

SAM: 148,8 milljón lítra mjólkurframleiðsla árið 2021

24.01.2022

Samkvæmt yfirliti Samtaka afurðastöðva í mjólkuriðnaði (SAM) nam heildarinnvigtun ársins 2021 um 148,8 milljónum lítra. Heildarinnvigtun ársins á undan, 2020, nam 151,2 milljónum lítra sem þýðir að heildarinnvigtun mjólkur hefur dregist saman um 1,6% eða 2,4 milljón lítra á milli ára.

Þetta ætti því miður ekki að koma á óvart þar sem samdráttur hefur verið í framleiðslu alla mánuði ársins að undanskildum mars, ágúst og nóvember. Í desember 2021 nam innvigtun mjólkur 11,8 milljónum lítra sem er 1% minni framleiðsla en í desember 2020.

Sala ársins 2021 á fitugrunni var 144,3 milljónir lítra sem er aukning um 1,1% frá því árinu áður. Sala mjólkur á próteingrunni jókst einnig á milli ára og endaði í 123,6 milljónum lítra, sem er aukning um 0,9% frá 2020. Þetta verður að teljast sem ágætis árangur þegar litið er til ástandsins á markaði vegna Covid-19 og jákvætt er að sjá að salan virðist aðeins vera að rétta úr sér.

Sé litið til síðustu þriggja mánuði ársins 2021 varð 1,6% aukning í sölu á próteingrunni á meðan samdráttur varð í sölu á fitugrunni um 0,6%. Samanburður á desember mánuði milli áranna 2021 og 2020 gefur okkur að sala á próteingrunni var 2,3% meiri í desember 2021 samanborið við árið á undan en sala á fitugrunni var aftur á móti 5,5% minni árið 2021 samanborið við árið á undan.

 

Til fróðleiks og samanburðar má hér sjá helstu lykiltölur mjólkurframleiðslu og -sölu síðan 2005:

Ár Innvigtun mjólkur (millj. lítra) Sala á próteingrunni (millj. lítra) Sala fitugrunni (millj. lítra)
2021 148,8 123,6 144,3
2020 151,2 122,5 142,8
2019 151,8 126,2 147
2018 152,4 129,5 144,8
2017 151,1 132,3 144,1
2016 150,2 129 139,2
2015 146 122,6 132,8
2014 133,5 121,2 129
2013 122,9 117,6 120,8
2012 125,1 115,5 114,1
2011 124,8 113,7 111,5
2010 123,2 114,7 110,7
2009 125,6 117,7 115,6
2008 126,1 117,1 112,3
2007 124,8 114,9 108,9
2006 117,1 113,2 103,9
2005 109,5 112,3 100,8