Samkvæmt yfirliti Samtaka afurðastöðva í mjólkuriðnaði (SAM) var sala á fitugrunni 145,1 milljón lítrar síðustu 12 mánuði (október 2019 – september 2020) og 122,5 milljónir lítra á próteingrunni. Það þýðir að salan á bæði prótein- og fitugrunni hefur dregist saman miðað við sambærilegt tímabil fyrir ári síðan. Alls dróst salan á próteingrunni saman um 3,4% síðustu 12 mánuði, og á sama tíma dróst salan á fitugrunni saman um 0,1%. Sé horft til síðustu þriggja mánaða nam sölusamdrátturinn 5,5% á próteingrunni og  3,6% á fitugrunni. Salan jókst þó miðað við september í fyrra um 1,7% á próteingrunni og 3,1% á fitugrunni.

Á sama tíma, þ.e. síðustu 12 mánuði, hefur mjólkurframleiðslan aukist í samanburði við sambærilegt tímabil mánuðina 12 þar á undan. Þannig nam innvigtun mjólkur 153,1 milljón lítra sem er 1,9% aukning frá sama tímabili fyrir ári síðan. Nam heildar innvigtunin í september 11,5 milljónum lítra, sem er rúmlega 180 þúsund lítrum minna en í september árið 2019 og því samdráttur um 1,6%.