Aldrei áður í sögu Bandaríkjanna hafa verið jafn margir bændamarkaðir þar í landi en samkvæmt upplýsingum landbúnaðarráðuneytisins hefur fjöldi þeirra vaxið um 9,6% á milli ára. Markaðirnir þjóna afar þýðingarmiklu hlutverki enda fá bændurnir sem selja á þessum mörkuðum hærra skilaverð fyrir afurðir sínar og neytendur afar gott aðgengi að ferskum landbúnaðarvörum.

 

Flestir markaðir eru í Kalíforníufylki eða 827 en næst flestir eru í New York fylki eða 647. Bandaríska ríkisstjórnin styður markvisst við uppbyggingu á bændamörkuðum og lögðu nýverið 4 milljónir dollara í sjóð sem ætlað er að gera þessum mörkuðum mögulegt að koma sér upp betri búnaði til rafrænna viðskipta. Þá standa stjórnvöld einnig á bak við kynningarátak sem byggir á því að auðvelda neytendum að finna nálæga bændamarkaði á veraldarvefnum svo dæmi sé tekið.

 

Framundan er sérstök uppskeruvika á bændamörkuðum Bandaríkjanna en dagana 5.-11. ágúst standa flestir þessara markaða fyrir allskonar uppákomum og skemmtunum til þess að draga enn frekari athygli að þessu viðskiptaformi við sölu landbúnaðarvara. Stjórnvöld taka svo virkan þátt í uppákomunni með því að verðlauna þá markaði sem standa sig vel og veita bændunum jafnframt viðurkenningar fyrir þátttöku sína.

 

Á heimasíðu landbúnaðarráðuneytisins má skoða áhugaverðar upplýsingar um þessa markaði og á sérstakri leitarsíðu (http://search.ams.usda.gov/farmersmarkets) má t.d. sjá að ostar og aðrar mjólkurvörur beint frá kúabúum og smáum afurðastöðvum er að finna á alls 2.196 mörkuðum af þessum rúmlega 7.800/SS.