Það gekk heldur betur mikið á í þýskum kúabúskap árið 2016, en það ár hættu samtals 4.081 kúabú í mjólkurframleiðslu og nemur fækkunin á einu ári 5,6%. Eftir standa þó all nokkur kúabú í Þýskalandi eða alls um 69 þúsund talsins. Þrátt fyrir að kúabúunum hafi fækkað um þessi 5,5% þá hefur kúnum ekki fækkað jafn mikið, en þeim hefur þó fækkað og það um 1,6% eða 67 þúsund mjólkurkýr. Þetta þýðir með öðrum orðum að þau bú sem hætta hafa annað hvort náð að selja kýrnar til lífs eða eru verulega mikið minni en meðalbúið í Þýskalandi.

Það sem vekur athygli, þegar tölfræði þýskrar mjólkurframleiðslu er skoðuð, er að kúnum hefur fækkað mikið síðustu 6 mánuði ársins eða um 54 þúsund og skýrist það væntanlega fyrst og fremst af erfiðri stöðu mjólkurframleiðslunnar framan af árinu og lágu afurðastöðvaverði. Þegar leið á árið, og ekkert bólaði á verðhækkun, tóku margir þá ákvörðun að hætta og raunar var sú ákvörðun einnig tekin af fjármálafyrirtækjum í einhverjum tilvikum/SS.