Gefin hefur verið út reglugerð um flutning líflamba milli landsvæða. Hún fjallar um alla flutninga á líflömbum og kiðum yfir varnarlínur, vegna endurnýjunar bústofns vegna niðurskurðar af völdum sjúkdóma, búháttabreytinga og/eða kynbóta á fjárstofni bús.
Reglugerðina má nálgast á vef Matvælastofnunar undir "Lög og Reglur/Búfjárrækt".

Þeir sem hyggjast selja líflömb skulu sækja um það til Matvælastofnunar fyrir 1. júlí á sérstökum eyðublöðum, sem er að finna á heimasíðu stofnunarinnar. Matvælastofnun veitir leyfi fyrir 1. ágúst eða hafnar umsókninni ef umsækjandi uppfyllir ekki skilyrði reglugerðarinnar.

Listi yfir þá sem fengið hafa leyfi til sölu á líflömbum verður birtur á heimasíðu MAST 1. ágúst.

Þeir sem hyggjast kaupa líflömb skulu sækja um það til Matvælastofnunar fyrir 15. ágúst á sérstökum eyðublöðum, sem er að finna á heimasíðu stofnunarinnar. Matvælastofnun veitir leyfi fyrir 30. ágúst eða hafnar umsókninni ef umsækjandi uppfyllir ekki skilyrði reglugerðarinnar.

Tímasetningar fyrir umsóknir um kaup og sölu í ár eru tilgreindar í ákvæðum til bráðabirgða í reglugerðinni en tímasetningar fyrir næstu ár eru tilgreindar í 5. og 6. grein hennar.

Á vef Matvælastofnunar segir að það sé von hennar að þessar reglur verði til að einfalda ferli leyfisveitinga vegna kaupa og sölu á líflömbum. Þar sem reglugerðin kemur þetta seint út, er hætt við að bæði sauðfjárbændur og Matvælastofnun verði í kapphlaupi við tímann í sumar, en með góðri samvinnu ætti þetta að hafast að þeirra mati.

Matvælastofnun hvetur þá sem hyggjast sækja um að kynna sér reglugerðina vel fyrirfram.

/Matvælastofnun greindi frá.