Sænskur vísindamaður hefur nú sýnt fram á mikilvægi þess að allir aðilar sem þjónusta kúabændur skipti um stígvél við komu á kúabúin, en greint var frá rannsókninni í breska tímaritinu Veterinary Record. Gerði hann þetta með því að skoða samhengið á milli daglegra starfa, gegninga og vinnubragða á 257 sænskum kúabúum og skoðaði hann sérstaklega hvernig coronavírus og BRS vírus (BRSV) flyst á milli búa. Í ljós kom að á þeim búum þar sem gestir og þjónustuaðilar eru skikkaðir í stígvél búsins var tíðni mótefna gegn vírusunum lægri, þ.e. líkurnar á því að kýr höfðu smitast voru minni en á hinum búunum.

 

Skýringin á þessu er að það er afar erfitt að gera stígvél 100% hrein, jafnvel með góðum þvotti og því er í dag öllum kúabændum ráðlagt að eiga sérstök stígvélapör sem eru ætluð þjónustuaðilum sem fara oft á milli búa eins og t.d. dýralæknum, frjótæknum eða þjónustufólki véla og tækja/SS.