Samstarfsvettvangur um Matvælalandið Ísland hélt ráðstefnu um sérstöðu íslenskrar matvælaframleiðslu miðvikudaginn 10. apríl sl. á Hilton Reykjavík Nordica. Yfirskriftin var "Hvað má bjóða þér að borða? - Sérstaða og samkeppnisforskot í matvælaframleiðslu". Upptökur af erindum ráðstefnunnar eru nú aðgengilegar á Netinu:

1. Global change in food landscape - Henk Jan Ormel
2. Heilnæmi íslenskra matvæla - Hrönn Jörundsdóttir
3. Heilnæmi íslenskra matvæla - Vigdís tryggvadóttir og Briggite Brugger
4. Styrkur Íslands - matvælastefna í mótun - Vala Pálsdóttir
5. Matarferðaþjónusta á Norðurlandi - Arnheiður Jóhannsdóttir
6. Áfangastaðurinn Austurland - matarupplifun - María Hjálmarsdóttir

Á ráðstefnunni var fjallað um gildi sérstöðunnar og þær áskoranir sem margar þjóðir standa frammi fyrir í sinni matvælaframleiðslu. Kröfur um örugg matvæli, fá sótspor, virðingu fyrir umhverfinu og auðlindum, bætta lýðheilsu og heilbrigt búfé munu hafa mikil áhrif á matvælaframleiðslu um heim allan á komandi árum.

Henk Jan Ormel, ráðgjafi í dýrasjúkdómum hjá Matvæla- og landbúnaðarstofnun Sameinuðu þjóðanna (FAO), fjallar um tengsl milli matvælaöryggis og sjúkdóma í mönnum og dýrum og hvernig haga má baráttu gegn matarbornum sjúkdómum. Þá var fjallað um sérstöðu íslenskrar matvælaframleiðslu og hvernig á að sýna fram á hana og gefin dæmi um hvernig sérstaða er nýtt í markaðssetningu.

Að Matvælalandinu standa Samtök iðnaðarins, Bændasamtök Íslands, Matís, Íslandsstofa, Samtök ferðaþjónustunnar, Samtök fyrirtækja í sjávarútvegi, Matarauður Íslands og Háskóli Íslands.