Hollenski bankinn Rabobank, sem er sérhæfður banki á sviði landbúnaðarviðskipta, telur bjart útlit á sviði sölu mjólkurvara á heimsmarkaði næstu fimm árin. Í nýju áliti frá bankanum kemur fram að talið sé að eftirspurn eftir mjólkurvörum muni aukast um heil 12% á næstu fimm árum. Sem fyrr eru það markaðirnir í Kína, Indlandi og Suðaustur-Asíu sem talið er að muni bera uppi hina auknu eftirspurn.

 

Sérfræðingar bankans meta það svo að nú þegar sjáist þess merki að framleiðslan muni eiga í erfiðleikum með að anna þessari stórauknu eftirspurn og að um 20% vanti upp á. Þetta þýði í raun að ef ekki komi til veruleg framleiðsluaukning mjólkur í Evrópu og Bandaríkjunum þá muni fátt geta komið í veg fyrir hækkun mjólkurvara á heimsmarkaði á komandi árum/SS.