Nú hefur Portúgal slegist í hóp fleiri Evrópulanda sem standa þétt við bakið á sínum landbúnaði og hafa gert kröfu um skýra upprunamerkinu helstu landbúnaðarvara sem framleiddar eru í Portúgal og seldar í portúgölskum verslunum. Með því móti geta neytendur valið heimaframleiddar vörur umfram innfluttar. Það er greinilegt að fleiri og fleiri lönd hafa ákveðið að stíga þetta skref og með því leggja sínum landbúnaði lið í aukinni samkeppni við innflutning.

Hinar nýju reglur í Portúgal munu í fyrstu eingöngu gilda um mjólkurvörur eins og mjólk, rjóma, osta, smjör, jógúrt og aðrar sýrðar mjólkurvörur. Frumvarp um merkingarkröfuna hefur ekki enn verið samþykkt af portúgalska þinginu en búist er við því að það renni í gegn og mun þá í fyrstu gilda í tvö ár frá samþykktardegi/SS.