Landssamband kúabænda hefur, í samstarfi við fjölmarga aðila, tekið saman gögn um þróun í fjósbyggingum síðustu tvö ár, en sambærileg könnun var gerð haustið 2003. Fram kemur í niðurstöðum að fjósum hefur fækkað um 111 á þessum tveimur árum, úr 873 í 762 og lækkar hlutfall básafjósa úr 86% í 77%. Hlutfall legubásafjósa með mjaltaþjónum hefur hækkað gríðarlega mikið, eða úr 1,3% af heild haustið 2003 í 5,4% nú í

október 2005 og er með því hæsta sem gerist í heiminum. Þá vekur verðskuldaða athygli að enn er einn kúabóndi hér á landi sem handmjólkar og 16 til viðbótar eru með fötukerfi við mjaltir.

 

Meðfylgjandi eru fyrstu niðurstöður úttektar LK, en skýrsla með nánari greiningum á niðurstöðum eftir fjósgerðum, greiðslumarks eftir fjósgerðum og landssvæðum, þróun breytinga eftir búnaðarsambandssvæðum ofl. verður kynnt miðvikudaginn 9. nóvember nk.

 

Fjósgerðir	Haustið 2003	Hlutfall gerða	Haustið 2005	Hlutfall gerða
Básafjós með fötumjaltakerfi	24	2,7%	16	2,1%
Básafjós með rörmjaltakerfi	614	70,3%	487	63,9%
Básafjós með mjaltabás	114	13,1%	85	11,2%
Legubásafjós með mjaltabás	107	12,3%	133	17,5%
Legubásafjós með mjaltaþjónum	11	1,3%	39	5,1%
Annað	3	0,3%	2	0,3%
Samtals	873		762