Kýrin, sem ber hið virðulega nafn „Ever-Green-View My Gold-ET“, er svo sannarlega ekki meðalkýr og það sannaðist nýverið þegar hún sett nýtt afurðamet í Bandaríkjunum. Þá hafði hún á einu og sama mjaltaskeiðinu, sem reyndar varði alla 365 daga ársins, mjólkað 77.480 pundum mjólkur en það gerir hvorki meira né minna en 35.144 kg! Reyndar var mjólkin hennar í þynnra lagi en ársframleiðslan hjá Ever-Green-View nam 903 kg af fitu og 932 kg af próteini. Engu að síður eftirtektarverður árangur hjá þessari glæsilegu Holstein kú sem sló með þessu metið hennar Gigi frá því í fyrra, sem hægt er að lesa um með því að smella hér.

Til þess að setja þennan einstaka árangur í samhengi má geta þess að meðaltals skýrsluhaldsbúið með Holstein kýr í Bandaríkjunum var með 11.320 kg mjólkur árið 2015 og nam þá verðefnaframleiðslan 417 kg af fitu og 322 kg af próteini. Reyndar er rétt að geta þess að þátttaka í skýrsluhaldi í Bandaríkjunum er víst ekki nálægt því að vera eins og við þekkjum á Norðurlöndunum svo framangreind meðaltalsnyt gefur heldur ýkta mynd af hinu hefðbundna kúabúi í Bandaríkjunum/SS.