Þau eru orðin fá af stóru afurðafélögunum í heiminum sem ekki hafa markað sér skýra stefnu varðandi umhverfismál og sjálfbærni og nú hefur Fonterra frá Nýja-Sjálandi sett slíka stefnu. Það er þó aðeins annað hljóð í strokknum þarna niðurfrá en amk. hér í norðurhluta Evrópu, en félagið ætlar svolítið aðra leið en önnur þekkt félög eins og FrieslandCampina, Arla, Valio og TINE.

Fonterra gerir þetta þannig að það mun verðlauna sérstalega þá bændur sem ganga lengra en leiðbeiningar félagsins gera ráð fyrir! Félagið setur með öðrum orðum lágmarkskröfur á framleiðendur sína og þeir sem ganga lengra en lágmarks kröfurnar gera ráð fyrir munu fá bónus! Þetta er að öllum líkindum fyrsta félagið sem ákveður að fara þessa leið.

Félagið mun einnig gefa út skýrar leiðbeiningar sem ætlaðar eru til þess að auðvelda kúabændum að draga úr umhverfisáhrifum framleiðslunnar. Þá hefur félagið, sem er með starfsemi víða um heim, ákveðið að umhverfismál verði sett á oddinn hjá öllum söluaðlum Fonterra í heiminum og munar væntanlega um minna enda er Fonterra lang stærsti aðilinni í heiminum þegar horft er til sölu mjólkurvara yfir landamæri.

Í tilkynningu Fonterra um þessa nýju áætlun segir m.a. „Sjálfbærni fyrir samvinnufélagið okkar snýst um meira en umhverfismál heldur einnig um fólkið sem vinnur við framleiðsluna, um góða meðferð á dýrunum okkar, um aðlögun að breyttum áherslum og væntingum neytenda, auk þess sem hún snýst um að virða samfélagið og landið sem við bæði búum í og vinnum í“/SS.