Beint í efni

Nestlé stækkar og stækkar

04.04.2012

Svissneski matvælarisinn Nestlé er nú á höttunum eftir góðum fjárfestingatækifærum eftir afar gott rekstrarár árið 2011. Alls nam velta fyrirtækisins heilum 11.700 milljörðum íslenskra króna og hagnaður þess 1.331 milljarði íslenskra króna! Fyrir hagnaðinn ætti að vera hægt að fá ágætis fyrirtæki í matvælavinnslu en forsvarsmenn Nestlé horfa m.a. til barnamatvæladeildar Pfizers í þessu sambandi. Þeir eru þó ekki einir um þann áhuga en franski mjólkurrisinn Danone í samstarfi við Mead Johnson hafa einnig áhuga á barnamatvæladeild Pfizer.

 

Áhugi fyrirtækjanna á þessari sérhæfðu deild innan Pfizer keðjunnar liggur m.a. í afar sterkri stöðu þess á kínverska markaðinum en fyrirtækið er í dag fimmta stærsta í heiminum á þessu sviði. Það eru einmitt bæði Nestlé, Danone og Mead Johnson sem eru stærri nú þegar á þessu sviði. Það stefnir því leynt og ljóst í að á næstu mánuðum verði eitt af þessum fyrirtækjum með yfirburðastöðu á sviði barnamatarframleiðslu og þá sér í lagi framleiðslu barnamjólkurdufts/SS.