Svofelld fréttatilkynning hefur borist frá MS:

 

Mjólkursamsalan styður hugmyndir formanns Bændasamtakanna, sem fram komu í Ríkisútvarpinu í morgun,  um að setja þurfi skýrar reglur um upprunamerkingar matvæla hér á landi. Slíkar reglur hafa ekki verið til.  Mjólkursamsalan leggur áherslu á að vinna eingöngu úr innlendri mjólk.  Hinsvegar þegar um er að ræða samsett matvæli eru notuð stoðefni, bragðefni og íblöndunarefni sem óhjákvæmanlegt er að flytja inn til matvælavinnslu. Og nýjar reglur um uppruna þufa að taka mið af slíkum aðstæðum.

 

Það er meginstefna Mjólkursamsölunnar að upplýsa neytendur um framleiðsluhætti og öll frávik. Á undanförnum fimm árum hefur Mjólkursamsalan í tvígang notað innflutt mjólkurhráefni.  Annars vegar árið 2013 þegar félagið notaði um 80 tonn af erlendu smjöri sem hlutahráefni í nokkrar tegundir vinnsluvara. Það eru um 0,06% af heildarmjólkurhráefni þess árs og áður en það var flutt inn var gerð grein fyrir því í fréttum til hvaða vöruflokka hráefnið yrði nýtt í samræmi við stefnu félagsins um upplýsingar.  Ástæða þessa innflutnings var fordæmalaus aukning í neyslu fituríkari matvæla og samdráttur í mjólkurframleiðslu í landinu.    

Hitt tilvikið var árið 2009.  Þá nýtti Mjólkursamsalan tæp 8 tonn af innfluttum osti til bræðsluostagerðar. Til þessa var vísað í Kastljósi í gærkvöld.  Þetta voru um 0,006% af hráefni þess árs og um 2% hráefnis í bræðsluosta það árið.  Fyrirtækið telur að það hafi verið mistök að nýta þetta hráefni með þessum hætti.  Frá því var ekki greint opinberlega, sem er ekki í anda stefnu þess um upplýsingar til neytenda.  Mjólkursamsalan hefur þegar yfirfarið vinnuferla til að tryggja að slíkt eigi sér ekki stað aftur og biðst velvirðingar á þessum mistökum.  Í hruninu  2008 hrundi sala á innfluttum sérostum, sem Mjólkursamsalan hefur jafnan á boðstólnum fyrir veitingahús og smærri verslanir.  Þeir eru fluttir inn að ósk þessara aðila á hluta þeirra tollkvóta sem boðnir eru út árlega á Íslandi.  Mjólkursamsalan hefur að jafnaði fengið um 13% þeirra tollkvóta til innflutnings sem boðnir hafa verið út hér undanfarin fimm ár og eingöngu notað til innflutnings á þessum sérostum. 87% hafa farið til annarra aðila.  

Í tilefni af hugmyndum formanns Bændasamtakanna lýsir Mjólkursamsalan sig reiðubúna til samræðna og samstarfs um mótun skýrra og hagkvæmra reglna um upprunamerkingar og tekur undir hvatningu um að sú vinna hefjist sem fyrst.

 

Nánari upplýsingar gefur Einar Sigurðsson
Sími: 569 2202