Eftirfarandi tilkynning hefur borist frá MS og Auðhumlu:

 

„Stjórn Mjólkursamsölunnar hefur tekið ákvörðun um að verð á umframmjólk hækki úr 27 kr/l í 35 kr/l eða um 8 kr/l. Þetta verð gildir út verðlagsárið en verður endurskoðað þann 1. apríl og 1. júlí næskomandi og hækkað ef ástæða er til.

Verð þetta endurspeglar útflutningsverð okkar þegar við flytjum út skyr og smjör að frádregnum breytilegum kostnaði. Það er mikilvægt að iðnaðurinn og framleiðendur taki höndum saman og vinni skipulega að því að byggja upp útflutningsmarkað fyrir íslenskar mjólkurafurðir. Eðlilegt markmið væri að byggja upp útflutningsmarkað fyrir um 15 milljónir lítra af mjólk á næstu árum.

Útflutningur mjólkurafurða á árinu 2007 gekk ágætlega en væntingar okkar í byrjun árs voru um meiri útflutning á skyri en sala á skyri á Boston og New York svæðið sem hófst í mars 2007 hefur tekið lengri tíma að byggja upp en við áætluðum. Eftirfarandi tafla sýnir magn útfluttra mjólkurafurða á árinu 2007.

 

 

 

	Smjör kg	Skyr kg	Höfðingi kg	Dímon kg	Duft kg	Samtals
Janúar	25.000	6.165	207	280	0	31.652
Febrúar	54.541	5.344	144	190	0	60.219
Mars	88.584	21.129	252	310	0	110.275
Apríl	0	15.722	162	170	0	16.054
Maí	0	11.688	81	120	0	11.889
Júní	51.443	9.665	216	280	0	61.604
Júlí	0	12.254	72	110	0	12.436
Ágúst	193.000	10.809	99	120	0	204.028
September	137.175	10.476	180	240	150.000	298.071
Október	75.000	14.691	171	210	0	90.072
Nóvember	37.125	9.052	99	190	0	46.466
Desember	0	10.542	72	190	50.000	60.804
Samtals	661.868	137.537	1.755	2.410	200.000	1.003.570

 

Búið er að taka ákvörðun um gjaldtaka fyrir mjólkurflutninga verði 2,05 kr/l og er gert ráð fyrir að verðið verði endurskoðað fyrir 1. júlí næstkomandi. Það er stefna Auðhumlu að taka yfir kostnað vegna mjólkurflutninga eftir því sem efni og aðstæður leyfa. Raunkostnaður mjólkurflutninga á árinu 2007 eru áætlaður 2,89 kr/l þannig að niðurgreiðslan á síðasta ári nam 79 aurum á lítra eða samtals 90 milljónir króna. Við gerum ráð fyrir að niðurgreiðslan á þessu ári verði að lágmarki 88 aurar sem svarar þá til 103 milljón króna niðurgreiðslu og hækkar þannig um 13 milljónir króna á milli ára. Niðugreiðsla á mjólkurflutningum er auðvitað ekkert annað en arðgreiðsla til félagsmanna Auðhumlu“.