Fyrstu sjö mánuði þessa árs hefur mjólkurframleiðslan náð sér ágætlega á strik og nam heildar innvigtun mjólkurinnar 90,6 milljónum lítra en þetta kemur m.a. fram í yfirliti Samtaka afurðastöðva í mjólkuriðnaði (SAM) sem kom út fyrir helgi. Innvigtunin í júlí var 12,9 milljónir lítra sem er 3,8% meira en í júlí á síðasta ári. Það sem af er ári er heildarframleiðslan 1,5% minni en á sama tíma árið 2016 en það ár var sem kunnugt er metár í mjólkurframleiðslu hér á landi. Sé horft til síðustu 12 mánaða hefur framleiðslan verið 148,9 milljónir lítra sem er 1,9% minni heildarframleiðsla en sama tímabil árið áður.

Samkvæmt yfirlitinu frá SAM var sala á fitugrunni 144,3 milljónir lítra síðustu 12 mánuði og er það er aukning frá fyrra ári um 5,5%. Síðustu þrjá mánuði nam söluaukningin 2,7% miðað við sama tímabil fyrir ári.

Sala á próteingrunni undanfarna 12 mánuði var 132,1 milljónir lítra, sem er aukning um 3,0% frá árinu á undan. Ef litið er til síðustu þriggja mánaða varð hins vegar sölusamdráttur um 1,5% miðað við sömu mánuði í fyrra/SS.