Hið gamalgróna fyrirtæki, Mjólkurfélag Reykjavíkur, sem stofnað var 1917, mun hér eftir bera nafnið Lífland. Þessi ákvörðun var tekin vegna þeirra miklu breytinga sem orðið hafa á starfsvettvangi fyrirtækisins frá stofnun þess. Einnig hefur fyrirtækinu verið mörkuð ný stefna, „þar sem megináhersla er lögð á framúskarandi þjónustu sem kemur til móts við síbreytilegar óskir viðskiptavina með auknu vöruvali, sérhæfingu og snerpu“, eins og segir í fréttatilkynningu frá fyrirtækinu.

Einnig segir í fréttatilkynningu fyrirtækisins að nafnið „vísar til þess að starfsemi fyrirtækisins tengist nú mannlífi og dýralífi í landinu á mun breiðara sviði en í árdaga. Þannig verður nýja heitið samnefnari fyrir fjölþætta þjónustu og ráðgjöf er lýtur að landbúnaði, hestaíþróttum, dýrahaldi og útivist.“

Höfuðstöðvar Líflands eru við Korngarða í Reykjavík, þar sem verksmiðja  og fóðurafgreiðsla fyrirtækisins eru til húsa, en ný verslun fyrir bændur, hestamenn, sumarbústaðaeigendur og fleiri er á Lynghálsi 3.