Beint í efni

Mjólkureftirlit SAM: Viðhald kælivéla mikilvægt!

30.04.2012

Kristján Gunnarsson, mjólkureftirlitsmaður SAM sendi á dögunum áminningu til bænda á starfssvæði hans, um viðhald á kælivélum mjólkurtanka. Landssamband kúabænda leyfir sér að endurbirta pistil Kristjáns og er hlekkur á hann í heild sinni hér neðar á síðunni.

„Eitt af því sem þarf að gera áður en sumarið gengur í garð er að þrífa kæliristina (eimsvalann, kondensinn) á kælivél mjólkurtankans.

Ef hún er orðinn hálf stífluð af ryki og skít er hætta á að hún bili eða ofhitni með tilheyrandi leiðindum, kostnaðarsamri viðgerð og ónýtri mjólk og það kalla ég trassaskap eða kæruleysi.

 

Helsti bilunartími mjólkurtanka er á sumrin sem skýrist af þessum þáttum og vegna þess að of heitt verður við kælivélina og loftræsting er léleg.

 

Ef þið gerið þetta sjálfir þá er það þannig gert í stórum dráttum.

Þar sem hreinsun hefur verið framkvæmd árlega er oftast nóg að bursta úr ristinni með stífum þurrum bursta upp og niður (aldrei þvert á ristina því þá leggjast þær flatar) og athugið að ristarnar eru flugbeittar og geta skorið illa.

Ef mikil óhreinindi hafa safnast inní kælirinn er þörf á að láta renna í gegn með heitu vatni helst innan frá, en það er meiri aðgerð og krefst ítrustu varkárni svo ekki fari vatn í rafbúnað.

Hafið samband við fagmann ef þið viljið frekari upplýsingar um framgang þessa vorverks. Ekki þarf að taka það fram að tankurinn á að vera tómur þegar þetta er gert.

 

Síðan má benda þeim á sem eru að kaupa nýja mjólkurtanka að nú er hægt að fá þá með vatnskældum kælivélum og þá sleppa menn við þennan hluta þ.e. enginn kælirist.“

 

 

Pistill Kristjáns Gunnarssonar