Bráðabirgðauppgjör tæknihóps NMSM, vinnuhópsnorrænna afurðastöðva í mjólkuriðnaði hlutverk NMSM er að vinna að sameiginlegum málum sem snúa að mjólkurgæðum, sýnir að snarhægt hefur á útbreiðslu mjaltaþjóna miðað við fyrri ár. Árið 2012 sáust þess fyrst merki í Danmörku að tæknin hafði náð sinni mestu útbreiðslu þar og síðan þá hefur mjaltaþjónabúum fækkað jafnt og þétt og fækkaði t.d. dönskum mjaltaþjónabúum um 52 á síðasta ári og hurfu með þeim 73 mjaltaþjónar. Alls hefur mjaltaþjónabúum í Danmörku fækkað um 148 og 235 mjaltaþjóna frá því árið 2011. Hér á landi fjölgaði búunum um 10 á milli ára, sem er nokkuð minna en fyrra ár.

 

Í fyrsta skipti í tvo áratugi jókst ekki fjöldi mjaltaþjónabúa í Svíþjóð á milli ára og fækkaði mjaltaþjónabúunum þar um 117 á síðasta ári, úr 1.064 árið 2014 í 947 nú í árslok 2015. Um leið hurfu frá landinu einnig 214 mjaltaþjónar.

 

Í Finnlandi varð aukning á fjölda mjaltaþjónabúa en þeim fjölgaði um 46 á milli ára. Það er auðvitað góður vöxtur en þó minnsta aukning á fjölda mjaltaþjónabúa í rúman áratug og bendir til þess að verulega hafi dregið af þróuninni í Finnlandi.

 

Í Noregi jókst fjöldi mjaltaþjónabúa nokkuð, úr 1.376 í 1.504, eða um 128 en það er þó nærri helmingi minni aukning í fjölda en árið áður þegar mjaltaþjónabúunum fjölgaði um 233.

 

Í þessu bráðabirgðauppgjöri kemur fram að alls voru nú um áramótin 4.308 kúabú á Norðurlöndunum sem er heildaraukning um einungis 15 kúabú frá árslokum 2014. Þessi bú voru með 6.858 mjaltaþjóna nú í árslok 2015 og hefur heildarfjöldi þeirra nú dregist saman um 36 á milli ára. Rétt er að minna á að um bráðabirgðauppgjör er að ræða. Endanlegt uppgjör mun liggja fyrir í júní.

 

Þar sem framundan eru helgidagar verður vefurinn næst uppfærður laugardaginn 26. mars/SS.