Nýsjálenska afurðafélagið Fonterra er nú búið að birta sex mánaða uppgjör sem nær til loka janúar, þ.e. frá ágúst 2016 til og með janúar sl. Á þeim tíma hefur veltan aukist um 5% miðað við sama tímabil 12 mánuðum áður og það þrátt fyrir að innvigtun mjólkur hafi dregist saman um 4%. Þess má einnig geta að samdráttur varð einnig í innvigtun mjólkur í Ástralíu og það um heil 7% en í bæði Nýja-Sjálandi og Ástralíu stafar samdrátturinn af veðurfari, enda byggja bæði löndin mjólkurframleiðslu sína að mestu á beit.

Á þessum sex mánuðum hagnaðist Fonterra um 32 milljarða íslenskra króna sem er 2% aukning frá fyrra ári og segir í fréttatilkynningu um málið að hagnaðinn megi mikið til rekja til góðs árangurs Fonterra í Kína en útflutningur félagsins til Kína jókst um 12% á þessum sex mánuðum. Þá hefur salan almennt aukist í Asíu um 5% og þá hefur einnig orðið góður vöxtur í Suður-Ameríku en alls jókst útflutningur Fonterra þangað um 13%. Athygli vekur að félaginu hefur gengið verr að selja mjólkurvörur inn á markaði í Mið-Austurlöndum og Afríku og raunar varð 4% samdráttur í sölunni til þessara svæða. Það er nokkuð óvænt enda hafa mörg sterk afurðafélög í Evrópu verið að ná góðum árangri þar og má t.d. nefna hollenska félagið FrieslandCampina sem eitt dæmi/SS.